Niyonzima 'Mafia' Yanga

Haruna Niyonzima

Kiungo mpya wa Azam, Jean-Baptiste Mugiraneza 'Migi' amesema mchezaji mwenzake wa nafasi hiyo katika timu ya taifa ya Rwanda, Haruna Niyonzima alimshawishi kujiunga na Yanga badala ya mabingwa wapya wa Kombe la Kagame hao.

 

Siku chache kabla ya kuanza kwa michuano ya Kombe la Kagame mwezi uliopita, Migi (24) alijiunga na Azam kwa mkataba wa miaka miwili akitokea APR ya Rwanda.

 

Lakini kiungo fundi anayesifika kwa mabao ya kichwa na mashuti ya kushtukiza huyo angeweza kuwa ni mchezaji wa Yanga sasa kama angefuata ushawishi wa Niyonzima.

 

Katika mahojiano na moja vituo vya televisheni vya jijini Dar es Salaam juzi usiku, Migi alisema: "Niyonzima alinishauri nijiunge na Yanga (badala ya timu ya Chamazi), lakini uamuzi wangu ulikuwa kujiunga na Azam.

 

"Ukiwauliza mashabiki wa 'Apere' (APR) kuhusu safu bora ya kiungo iliyowahi kutokea kwenye timu yao, watakwambia ile niliyocheza na Niyonzima. Huyu jamaa ni fundi sana. Ninafurahi kucheza naye kwenye ligi moja hapa Tanzania.

 

"Tunaporudi timu ya taifa ya Rwanda, yeye ni nahodha na mimi ni msaidizi wake. Nilipenda hata kucheza naye timu moja, lakini Azam ni timu bora ambayo ina kila kitu... Miundombinu ya kisasa pamoja na walimu wazuri kama klabu za Ulaya."

 

Kiungo huyo aliyekabidhiwa jezi namba 16 Azam, amewahi kuchezea timu za Kiyovu Sport (2003-2006) na APR (2007 - Julai 14, 2015)

Ameichezea 'Amavubi' mechi 27 na kuifungia bao moja, na katika michezo 102 ya APR amefunga magoli 32.

CHANZO: NIPASHE