KAZI ZA ROHO MTAKATIFU

(a)            Roho Mtakatifu ni nani?

Roho mtakatifu ni Mungu. Unaposoma katika Neno Mungu unapata kuwa Roho Mtakatifu ni Mungu;

Petro akasema, Anania, kwa nini Shetani amekujaza moyo wako kumwambia uongo Roho Mtakatifu, na kuzuia kwa siri sehemu ya thamani ya kiwanja?
Kilipokuwa kwako, hakikuwa mali yako? Na kilipokuwa kimekwisha kuuzwa, thamani yake haikuwa katika uwezo wako? Ilikuwaje hata ukaweka neno hili moyoni mwako? Hukumwambia uongo mwanadamu, bali Mungu. (Matendo 5:3-5)

Petro anaanza na kusema kuwa Anania amemwambia uongo Roho Mtakatifu, halafu anaishia na kusema kuwa alimwambia uongo Mungu. Maana yake kumwambia uongo Roho mtakatifu ni kumwambia uongo Mungu.

Maandiko yanasema pia kuwa Muaqngu ni Roho na kwamba wamwabuduo imewapasa kumwabudu katika Roho na kweli

(b)            Makao ya Roho mtakatifu ni wapi?

Roho Mtakatifu hukaa ndani ya kila mtu aliyempokea Kristo kuwa Mwokozi wake. Maana yake ni kwamba unapookoka ndipo Roho Mtakatifu anaingia kwako na anaendelea kuishi ndani yako maadamu hali yako inaendelea kumruhusu akae ndani yako. Neno linatuambia kuwa Roho Mtakatifu anakaa ndani yetu na kuwa sisi ni hekalu la Mungu na kwamba tunapaswa kuwa watakatifu.

Hamjui ya kuwa ninyi mmekuwa hekalu la Mungu, na ya kuwa Roho wa Mungu anakaa ndani yenu? …  Kwa maana hekalu la Mungu ni takatifu, ambalo ndilo ninyi (1Wakorintho 3:16-17).

Au hamjui ya kuwa mwili wenu ni hekalu la Roho Mtakatifu aliye ndani yenu, mliyepewa na Mungu? Wala ninyi si mali yenu wenyewe (1Wakoritho 6:19).

Lakini ikiwa Roho wa Mungu anakaa ndani yenu, ninyi hamwufuati mwili; bali mwaifuata roho. Lakini mtu awaye yote asipokuwa na Roho wa Kristo, huyo si wake. Na Kristo akiwa ndani yenu, mwili wenu umekufa kwa sababu ya dhambi; bali roho yenu i hai, kwa sababu ya haki. Lakini, ikiwa Roho yake yeye aliyemfufua Yesu katika wafu anakaa ndani yenu, yeye aliyemfufua Kristo Yesu katika wafu ataihuisha na miili yenu iliyo katika hali ya kufa, kwa Roho wake anayekaa ndani yenu (Warumi 8:9-11).

Siku ile ya Pentekoste, Neno linatuambia kuwa watu walijazwa Roho Mtakatifu. Kitu hujazwa ndani ya kitu kingine na si vinginevyo; kwa jinsi hii Roho Mtakatifu aliingia na kujaa ndani ya watu.

Hata ilipotimia siku ya Pentekoste walikuwako wote mahali pamoja. Kukaja ghafula toka mbinguni uvumi kama uvumi wa upepo wa nguvu ukienda kasi, ukaijaza nyumba yote waliyokuwa wameketi. Kukawatokea ndimi zilizogawanyikana, kama ndimi za moto uliowakalia kila mmoja wao. Wote wakajazwa Roho Mtakatifu, wakaanza kusema kwa lugha nyingine, kama Roho alivyowajalia kutamka (Mdo 2:1-4).

(c)            Kazi za Roho Mtakatifu

Kazi za Roho Mtakatifu zinaweza kugawanywa katika sehemu kuu mbili:

           (i)        Kazi katika maisha ya mkristo binafsi

          (ii)        Kazi kwa ajili ya utumishi

            I.        Kazi ya Roho Mtakatifu katika Maisha ya Mkristo binafsi

Roho Mtakatifu huingia kuishi ndani ya Mkristo na kumhudumia binafsi kwa namna mbalimbali:

1.  Roho Mtakatifu ni Kiongozi

Kiongozi ni mtangulizi au aliyetangulia kuonyesha njia sahihi. Wana wa Mungu wanaongozwa na Roho wa Mungu.

Kwa kuwa wote wanaoongozwa na Roho wa Mungu, hao ndio wana wa Mungu. (Rumi 8:14). Wale waufuatao mwili hawawezi kumpendeza Mungu. Lakini ikiwa Roho wa Mungu anakaa ndani yenu, ninyi hamwufuati mwili; bali mwaifuata roho. Lakini mtu awaye yote asipokuwa na Roho wa Kristo, huyo si wake (Rumi 8:8-9).

Haiwezekani kuwa mwana wa Mungu kama hukuongozwa na Roho wa Mungu. Maana yake ni kwamba ili uwe mwana wa Mungu ni lazima ukubali kuongozwa na Roho Mtakatifu. Kuwa Mwana ni kuwa na haki zote mbele za baba. Mwana ndiye mrithi wa mali za baba yake. Haiwezekani kuurithi uzima wa milele mpaka umekuwa mwana wa Mungu na huwezi kuwa mwana wa Mungu mpaka umeongozwa na Roho Mtakatifu.

Lakini yeye atakapokuja, huyo Roho wa kweli, atawaongoza awatie kwenye kweli yote; kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake (Yohana 16:13). Lakini mkiongozwa na Roho, hampo chini ya sheria (Wagalatia 5:18).

Roho Mtakatifu ndiye wa kutuongoza na kututia kwenye kweli yote. Ili kumpendeza Mungu ni lazima kuongozwa na Roho Mtakatikfu akaaye ndani ya mwamini. Kumfuata Roho Mtakatifu kunasaidia kumpendeza Mungu na wale waufuatao mwili hawawezi kumpendeza Mungu.

2.  Roho Mtakatifu ni Mwalimu

Mwalimu ni yule anayefanya kazi ya kufundisha. Kufundisha ni kuelekeza au kutoa maarifa aliyonayo mtu kwenda kwa mwingine na kisasa zaidi ni kumwezesha mtu aweze kujifunza au kupata maarifa mengine zaidi ya yale aliyonayo na kwa hiyo kuweza kufanya au kusema na kuwaza yale yanayotakiwa. Roho Mtakatifu anatuwezesha kujua zaidi habari za Mungu na zaidi kujua mapenzi ya Baba yetu.

Lakini huyo Msaidizi, huyo Roho Mtakatifu, ambaye Baba atampeleka kwa jina langu, atawafundisha yote, na kuwakumbusha yote niliyowaambia. (Yohana 14:26). 

Na watakapowapeleka ninyi mbele ya masinagogi na maliwali na wenye mamlaka, msifadhaike kwa kuwaza maneno yenu jinsi mtakavyojibu au kusema; kwa kuwa Roho Mtakatifu atawafundisha saa ile ile yawapasayo kuyasema (Luka 12:11-12)

Roho Mtakatifu ni mwalimu aneyetufundisha yote kuhusiana na maisha ya kila siku ya kimwili na kiroho. Mkristo yeyote asiyejua mapenzi ya Mungu huyo kunakuwa na mashaka kuwa ana Roho Mtakatifu na kama anaye, basi ni mwanafunzi mbaya asiyezingatia yale anayofundishwa. Kibaya zaidi ni kwamba ikitokea Mwanafunzi huyu hawezi kufuata mafundisho ya Roho Mtakatifu, Roho Mtakatifu humwacha. Matokeo ya kuachwa na Roho Mtakatifu ni kubaki huelewi chochote katika maisha yako kiroho na kimwili- unaaendelea kubaki mjinga siku zote jambo ambalo ni hatari. Kuwa mwanafunzi mzuri kwa Roho Mtakatifu. Jambo la kujiuliza hapa ni; Je, unaye huyo mwalimu maishani mwako? Je, unamsikiliza, kumwelewa na kumtii mwalimu huyo?

3.  Roho Mtakatifu Hushuhudia Uhusiano Wa Mkristo Na Mungu

Uhusiano wa Mkristo na Mungu hushuhudiwa na Roho Mtakatifu. Kwa njia ya Roho Mtakatifu Mkristo hutambua uhusiano wake na Mungu ulivyo, kwamba ni mzuri au ni mbaya – kwamba     unaye Mungu au hunaye. Kwa sababu hiyo hakuna mtu anayeweza kijitetea kuwa hajui uhusiano alionao na Mungu wake.

Roho mwenyewe hushuhudia pamoja na roho zetu, ya kuwa sisi tu watoto wa Mungu (Rumi 8:16).

Anayetutambulisha sisi kuwa tu watoto wa Mungu ni Roho Mtakatifu. Tunaweza kutambua kuwa tumeokoka kwa kushuhudiwa na Roho Mtakatifu na pia kwamba hatujaokoka, Roho Mtakatifu ndiye anayetushudia nafsini mwetu.

Yesu Kristo alisema mtu yeeyote akikaa nadani yake naye atakaa ndani yake lakini kwa sharti moja la kuzishika amri zake. Tunaweza kujua uhusiano huo pale tu roho Mtakatifu atakapokuwa ametushuhudia.

Naye azishikaye amri zake hukaa ndani yake yeye naye ndani yake. Na katika hili tunajua ya kuwa anakaa ndani yetu, kwa huyo Roho aliyetupa (1Yohana 3:24).

Katika yeye ninyi nanyi mnajengwa pamoja kuwa maskani ya Mungu katika Roho (Waefeso 2:22)

Kujua kuwa Yesu anakaa ndani yetu nasi tunakaa ndani yake ni kwa njia ya Roho Mtakatifu aliyetupa.

Neno la mungu pia linatuambia kuwa hakuna mtu yeyote aliyemwona mungu wakati wowote isipokuwa tu kama tukipendana. Hii ni kwa sababu ametushirikisha Roho Mtakatifu.

Hakuna mtu aliyemwona Mungu wakati wo wote. Tukipendana, Mungu hukaa ndani yetu, na pendo lake limekamilika ndani yetu. Katika hili tunafahamu ya kuwa tunakaa ndani yake, naye ndani yetu, kwa kuwa ametushirikisha Roho wake (Yoh.4:12-13).

Kwa kutushirikisha Roho Mtakatifu, tunafahamu kuwa tunakaa ndani yake (Yesu) na yeye ndani yetu. Tunafahamu kukamilika au kutokamilika kwa pendo lake kwetu kwa kushirikishwa na Roho Mtakatifu. Urafiki wetu na Mungu ni kwa kutii sheria ya Mungu sawasawa na nia ya Roho ambayo ni uzima na amani.

Kwa kuwa nia ya mwili ni mauti; bali nia ya roho ni uzima na amani. Kwa kuwa ile nia ya mwili ni uadui juu ya Mungu, kwa maana haitii sheria ya Mungu, wala haiwezi kuitii. Wale waufuatao mwili hawawezi kumpendeza Mungu (Warumi 8:6-8).

Roho Mtakatifu ndiye anayeshuhudia uhusiano tulionao na Mungu wetu, kwamba ni mzuri au ni mbaya. Kuwa mwangalifu pale atakapokushuhudia na uwe mtii na kubadilika inapotokea anakujulisha kuwa mahusiano yako na Mungu si mazuri.

Roho Mtakatifu anatusaidia kuelewa wokovu halisi ndani yetu. Kwa kutuhakikishia dhambi, haki na hukumu.

Lakini mimi nawaambia iliyo kweli; yawafaa ninyi mimi niondoke, kwa maana mimi nisipoondoka, huyo Msaidizi hatakuja kwenu; bali mimi nikienda zangu, nitampeleka kwenu. Naye akiisha kuja, huyo atauhakikisha ulimwengu kwa habari ya dhambi, na haki, na hukumu (Yohana 16:7-8).

Ili tuweze kuuona ufalme wa Mungu ni lazima kuzaliwa (kubatizwa) katika Roho. Mahusiano mazuri na Mungu ndiyo yatakayotuwezesha kuurithi ufalme wa Mungu na hayawezi kuwepo kama hatukuwa na Roho Mtakatifu.

Nikodemo akamwambia, Awezaje mtu kuzaliwa, akiwa mzee? Aweza kuingia tumboni mwa mamaye mara ya pili akazaliwa? Yesu akajibu, Amin, amin, nakuambia, Mtu asipozaliwa kwa maji na kwa Roho, hawezi kuuingia ufalme wa Mungu. Kilichozaliwa kwa mwili ni mwili; na kilichozaliwa kwa Roho ni roho (Yohana 3:4-6).

Matendo yetu hayawezi kututhibitishia uhusiano wetu na Mungu pamoja na haki tulizonazo isipokuwa kwa rehema zake Mungu na kwa kufanywa upya na Roho Mtakatifu.

si kwa sababu ya matendo ya haki tuliyoyatenda sisi; bali kwa rehema yake, kwa kuoshwa kwa kuzaliwa kwa pili na kufanywa upya na Roho Mtakatifu; ambaye alitumwagia kwa wingi, kwa njia ya Yesu Kristo Mwokozi wetu; ili tukihesabiwa haki kwa neema yake, tupate kufanywa warithi wa uzima wa milele, kama lilivyo tumaini letu (Tito 3:5-7)

4.  Husaidia Kuishi Maisha ya Kumpendeza Mungu

Ni vigumu sana kuishi maisha ya kumpendeza Mungu kama tusipoenenda kwa Roho. Miili yetu imejaa tamaa nyingi na husukumwa kuzitimiza. Hakuna njia ya kuzikwepa isipokuwa tu kwa msaada wa Roho Mtakatifu.

Basi nasema, Enendeni kwa Roho, wala hamtazitimiza kamwe tamaa za mwili. Kwa sababu mwili hutamani ukishindana na Roho, na Roho kushindana na mwili; kwa maana hizi zimepingana, hata hamwezi kufanya mnayotaka. Lakini mkiongozwa na Roho, hampo chini ya sheria. Basi matendo ya mwili ni dhahiri, ndiyo haya, uasherati, uchafu, ufisadi, ibada ya sanamu, uchawi, uadui, ugomvi, wivu, hasira, fitina, faraka, uzushi, husuda, ulevi, ulafi, na mambo yanayofanana na hayo, katika hayo nawaambia mapema, kama nilivyokwisha kuwaambia, ya kwamba watu watendao mambo ya jinsi hiyo hawataurithi ufalme wa Mungu. Lakini tunda la Roho ni upendo, furaha, amani, uvumilivu, utu wema, fadhili, uaminifu, upole, kiasi; juu ya mambo kama hayo hakuna sheria. Na hao walio wa Kristo Yesu wameusulibisha mwili pamoja na mawazo yake mabaya na tamaa zake. Tukiishi kwa Roho, na tuenende kwa Roho (Wagalatia 5: 16-25).

Kwa sababu sheria ya Roho wa uzima ule ulio katika Kristo Yesu imeniacha huru, mbali na sheria ya dhambi na mauti (Warumi 8:2).

Tunamjua Mungu kwa njia ya hekima itokanayo na Roho ya hekima na ufunuo wa namna ya kumjua yeye.

Mungu wa Bwana wetu Yesu Kristo, Baba wa utukufu, awape ninyi roho ya hekima na ya ufunuo katika kumjua yeye; (Waefeso 1:17).

Roho Mtakatifu ndiye athibitishaye imani yetu kwa Mungu

Nanyi pia katika huyo mmekwisha kulisikia ule la kweli, habari njema za wokovu wenu; tena mmekwisha kumwamini yeye, na kutiwa muhuri na Roho ule wa ahadi aliye Mtakatifu. Ndiye aliye arabuni ya urithi wetu, ili kuleta ukombozi wa milki yake, kuwa sifa ya utukufu wake (Waefeso 1:13-14)

5.  Husaidia Katika Maombi

Hufika wakati ambapo wakristo hushindwa kuomba kwa jinsi iwapasavyo na kwa kiwango ambacho Mungu anaweza kujibu. Wakati mwingine hawajui kiwapasacho kuomba kwa sababu pia hawajui haja halisi walizonazo katika maisha yao. Wakati mwingine wakristo huwa na mzigo mzito ambao huwafanya hata washindwe kuomba kwa sababu ya kulemewa nao. Inapofika nyakati za namna hiyo, Roho Mtakatifu huingilia kati na kuomba kwa niaba yao. Biblia inasema, Roho Mtakatifu huomba akituaidia udhaifu wetu. Na kwamba huomba kwa kuugua kusikoweza kutamkwa.

Kadhalika Roho naye hutusaidia udhaifu wetu, kwa maana hatujui kuomba jinsi itupasavyo, lakini Roho mwenyewe hutuombea kwa kuugua kusikoweza kutamkwa. Na yeye aichunguzaye mioyo aijua nia ya Roho ilivyo, kwa kuwa huwaombea watakatifu kama apendavyo Mungu (Warumi 8:26-27).

6.  Hutoa Nguvu na Uzima wa Miili

Ufufuo wa Yesu una faida sana kwetu. Kitendo cha Yesu kufufuka kimetusaidia sisi pia kuwa hai katika miili yetu kwa iliyokuwa katika hali ya kufa. Roho Mtakatifu ndiye aliyemfufua Yesu Roho huyohuyo anakaa ndani yetu

Lakini, ikiwa Roho yake yeye aliyemfufua Yesu katika wafu anakaa ndani yenu, yeye aliyemfufua Kristo Yesu katika wafu ataihuisha na miili yenu iliyo katika hali ya kufa, kwa Roho wake anayekaa ndani yenu (Warumi 8:11).

         II.        Kazi Ya Roho Mtakatifu Kwa Ajili Ya Utumishi

Pamoja na faida za mwamini binafsi ambazo tumeziona kwa kule kujazwa  na Roho Mtakatifu, Mungu pia anataka kumjaza na kumbatiza mwamini kwa Roho Mtakatifu ili kumtia nguvu za kumtumikia na kumtukuza Mungu duniani. Bila kuwa na nguvu za ki-Mungu ambazo tunazipokea kupitia Roho wake Mtakatifu hatuwezi kumtumikia Mungu ipasavyo. Ndiyo maana Yesu aliwaambia wanafunzi wake wakae Yerusalemu mpaka hapo wakapokuwa wamebatizwa kwa Roho Mtakatifu – atakapowaletea msaidizi kwa ajili ya kazi ya Mungu.

Hata alipokuwa amekutana nao aliwaagiza wasitoke Yerusalemu, bali waingoje ahadi ya Baba, ambayo mlisikia habari zake kwangu; ya kwamba Yohana alibatiza kwa maji, bali ninyi mtabatizwa katika Roho Mtakatifu baada ya siku hizi chache (Matendo 1:4-5).

1.  Kutoa nguvu na ujasiri wa kushuhudia

Nguvu (uwezo wa kufanya kazi au jambo) na ujasiri (kutenda jambo bila kuogopa/bila woga/bila mashaka) wa kuweza kumshuhudia Yesu Kristo unatokana na nguvu ya Mungu iliyoko ndani yako. Nguvu ya Mungu ni uwezo wa ki-Mungu wa kufanya kazi au jambo. Roho Mtakatifu anapoingia ndani ya mwamini husababisha mtu huyo kupata nguvu ya Mungu na kupata ujasiri wa kuweza kushuhudia matendo makuu ya Mungu na habari ya Yesu Kristo kwa ujmla wake. Yesu Kristo alikaa na wanafunzi wake kwa miaka mingi akiwafundisha na alipomaliza kazi yake anasema hawawezi kuifanya kazi yake mpaka hapo watakpokuwa wamejazwa na nguvu za Roho Mtakatifu. Alijua kuwa haiwezekani kuwa mashahidi wake bila kuwezeshwa na nguvu ya Roho Mtakatifu.

Lakini mtapokea nguvu, akiisha kuwajilia juu yenu Roho Mtakatifu; nanyi mtakuwa mashahidi wangu katika Yerusalemu, na katika Uyahudi wote, na Samaria, na hata mwisho wa nchi (Matendo 1:8).

Kwa maneno haya ni dhahiri kuwa mtu hawezi kuwa shahidi wa Kristo mpaka ajiliwe na Roho Mtakatifu.

Hata walipokwisha kumwomba Mungu, mahali pale walipokusanyika pakatikiswa, wote wakajaa Roho Mtakatifu, wakanena neno la Mungu kwa ujasiri (matendo 4:31).

Kumbuka jinsi ambavyo Petro alitaka kumfuata Yesu na kushiriki mateso yake. Petro alimwambia Yesu kuwa atakuwa naye popote atakapokwenda hata kuteswa, kifo na hata kifungoni.

Akamwambia, Bwana, niwapo pamoja nawe, mimi ni tayari kwenda gerezani au hata kifoni. Akasema, Nakuambia, Petro, jogoo hatawika leo, kabla wewe hujanikana mara tatu ya kuwa hunijui …… Na walipokwisha washa moto katikati ya kiwanja, waliketi pamoja, naye Petro akaketi kati yao. Ndipo mjakazi mmoja akamwona ameketi mwangani, akamkazia macho akasema, Na huyu alikuwa pamoja naye. Akakana, akisema, Ee mwanamke, simjui. Baadaye kitambo mtu mwingine alimwona akasema, Wewe nawe u mmoja wao. Petro akasema, Ee mtu, si mimi. (Luka 22:33-34, 55-58).

Kanachosababisha Petro amkane Yesu ni kukosa nguvu na ujasiri wa kumshuhudia Yesu kwa kuwa hana Roho Mtakatifu. Petro huyohuyo anapojazwa na nguvu za Roho Mtakatifu siku ile ya Pentekoste anakuwa nguvu na ujasiri wa kuzinena siri za kristo bila kuogopa.

13 Wengine walidhihaki, wakisema, wamelewa kwa mvinyo mpya. 14 Lakini Petro akasimama pamoja na wale kumi na mmoja, akapaza sauti yake, akawaambia, Enyi watu wa Uyahudi, na ninyi nyote mkaao Yerusalemu, lijueni jambo hili, mkasikilize maneno yangu. 15 Sivyo mnavyodhani; watu hawa hawakulewa, kwa maana ni saa tatu ya mchana; 16 lakini jambo hili ni lile lililonenwa kwa kinywa cha nabii Yoeli,
17 Itakuwa siku za mwisho, asema Mungu, nitawamwagia watu wote Roho yangu, na wana wenu na binti zenu watatabiri; na vijana wenu wataona maono; na wazee wenu wataota ndoto …….. 37 Walipoyasikia haya wakachomwa mioyo yao, wakamwambia Petro na mitume wengine, Tutendeje, ndugu zetu?  38 Petro akawaambia, Tubuni mkabatizwe kila mmoja kwa jina lake Yesu Kristo, mpate ondoleo la dhambi zenu, nanyi mtapokea kipawa cha Roho Mtakatifu.  39 Kwa kuwa ahadi hii ni kwa ajili yenu, na kwa watoto wenu, na kwa watu wote walio mbali, na kwa wote watakaoitwa na Bwana Mungu wetu wamjie. 40 Akawashuhudia kwa maneno mengine mengi sana na kuwaonya, akisema, Jiokoeni na kizazi hiki chenye ukaidi. 41 Nao waliolipokea neno lake wakabatizwa; na siku ile wakaongezeka watu wapata elfu tatu. (Matendo 2:14-41).

Yote haya yalifanyika kwa sababu yalijazwa na Roho Mtakatifu. Aliowaogopa siku ile ya mateso ya Yesu ndio haohao aliowahubiria siku ya Pentekoste na wakapata kuokoka watu wengi sana.

2.  Kuleta ufahamu Mpya wa Neno la Mungu

Ufahamu ni uwezo wa kuelewa maneno au mambo. Roho Mtakatifu hutusaidia kuyaelewa maandiko matakatifu yaani Neno la Mungu. Kati ya mambo magumu na mabaya ni kutolielewa Neno la Mungu ambako husababisha matatizo makubwa.

9 lakini, kama ilivyoandikwa, Mambo ambayo jicho halikuyaona wala sikio halikuyasikia, (Wala hayakuingia katika moyo wa mwanadamu,) Mambo ambayo Mungu aliwaandalia wampendao. 10 Lakini Mungu ametufunulia sisi kwa Roho. Maana Roho huchunguza yote, hata mafumbo ya Mungu. 11 Maana ni nani katika binadamu ayajuaye mambo ya binadamu ila roho ya binadamu iliyo ndani yake? Vivyo hivyo na mambo ya Mungu hakuna ayafahamuye ila Roho wa Mungu. 12 Lakini sisi hatukuipokea roho ya dunia, bali Roho atokaye kwa Mungu, makusudi tupate kuyajua tuliyokirimiwa na Mungu. 13 Nayo twayanena, si kwa maneno yanayofundishwa kwa hekima ya kibinadamu, bali yanayofundishwa na Roho, tukiyafasiri mambo ya rohoni kwa maneno ya rohoni (1Wakorintho 2:9-13).

13 Lakini yeye atakapokuja, huyo Roho wa kweli, atawaongoza awatie kwenye kweli yote; kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake (Yohana 16:13).

3.  Huwezesha kufanya ibada ya kweli ya Mungu

Ibada ni tendo la kuaabudu au sala ya kumwabudu Mungu. Kufanya ibada takatifu naya kweli huwezekana tu ikiwa tunaye Roho Mtakatifu. Ibada ya kweli hufanyika ndani ya moyo na haiwezi kufanyika ndani ya Moyo kama hakuwemo humo Roho Mtakatifu.

18 Tena msilewe kwa mvinyo, ambamo mna ufisadi; bali mjazwe Roho; 19 mkisemezana kwa zaburi na tenzi na nyimbo za rohoni, huku mkiimba na kumshangilia Bwana mioyoni mwenu; 20 na kumshukuru Mungu Baba sikuzote kwa mambo yote, katika jina lake Bwana wetu Yesu Kristo; 21 hali mnanyenyekeana katika kicho cha Kristo (Waefeso 5:18- 21).

4.  Kumtukuza Yesu Kristo

Yesu mwenyewe alisema kuwa atakapokuja Roho Mtakatifu atamtukuza yeye kwa sababu atayachukua yaliyo yake (Yesu) na kutupasha habari.

13 Lakini yeye atakapokuja, huyo Roho wa kweli, atawaongoza awatie kwenye kweli yote; kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake. 14 Yeye atanitukuza mimi, kwa kuwa atatwaa katika yaliyo yangu na kuwapasha habari. 15 Na yote aliyo nayo Baba ni yangu; kwa hiyo nalisema ya kwamba atatwaa katika yaliyo yangu, na kuwapasheni habari (Yohana 16:13-15

5.  Kushuhudia uhai wa Yesu

Kati ya mambo ambayo ni ya muhimu na ya msingi ni kwa Yesu kuwa hai. Kama Yesu asingalikufa na kufufuka basi ingalikuwa ni kazi bure kwetu kuwa Wkristo kwa sababu Wokovu ungalikuwa haupo. Hivyo Roho Mtakatifu ndiye anayetushuhudia kuwa Yesu yu hai.

30 Mungu wa baba zetu alimfufua Yesu, ambaye ninyi mlimwua mkimtundika katika mti. 31 Mtu huyo Mungu amemtukuza kwa mkono wake wa kuume, awe Mkuu na Mwokozi, awape Waisraeli toba na msamaha wa dhambi. 32 Na sisi tu mashahidi wa mambo haya, pamoja na Roho Mtakatifu ambaye Mungu amewapa wote wamtiio (Matendo 5:30-32).

6.  Kuleta karama za Roho Mtakatifu

Katika kamusi ya Kiswahili Sanifu neno ‘Karama’ limetafsiriwa kama “Kipawa anachokuwa nacho mtu kwa sababu ya kumwabudu sana Mungu aghalabu humpa uwezo wa kuomba haja kwa Mwenyezi Mungu na kukubaliwa mara moja; ikibali ya kupokewa haja iombwayo” na neno ‘kipawa’ linatafsiriwa kama “uwezo mtu aliozaliwa nao ambao humwezesha kufanya jambo Fulani vizuri”.

Katika kamusi ya kiswahili kwa kiingereza, neno ‘karama’ limetafsiriwa kama gracious gifts likiwa na maana ya zawadi za neema, ‘Neema’ ni kustahilishwa bila kustahili au bure. Kwa hiyo zawadi za neema ni zawadi ambazo mtu anazipata bila kustahili au kuzigharimia. Maana yake mtu anapata zawadi kwa sababu aliyempa ameamua kumpa na kwamba anaweza kunyimwa yeye na akapewa mwingine na hawezi kudai kwa sababu siyo haki yake.

Kwa jinsi hiyo basi karama za Roho Mtakatifu ni zawadi ambazo Roho Mtakatifu huwapa watu (wakristo wamwabuduo sana) kwa neema na ndiye huamua ampe nani, zawadi gani bila kujali anapenda au hapendi.

4 Basi pana tofauti za karama; bali Roho ni yeye yule. ….. 8 Maana mtu mmoja kwa Roho apewa neno la hekima; na mwingine neno la maarifa, apendavyo Roho yeye yule; 9 mwingine imani katika Roho yeye yule; na mwingine karama za kuponya katika Roho yule mmoja; 10 na mwingine matendo ya miujiza; na mwingine unabii; na mwingine kupambanua roho; mwingine aina za lugha; na mwingine tafsiri za lugha; 11 lakini kazi hizi zote huzitenda Roho huyo mmoja, yeye yule, akimgawia kila mtu peke yake kama apendavyo yeye (1Wakorintho 12:4, 8-10). Soma pia Matendo 2:4; 10:46 ;19:6

Roho Mtakatifu huzileta karama hizo katika kanisa kwa ajili ya kurahisisha ujenzi wa kanisa lake pamoja na kazi zake. Ili kanisa lijengeke, tunahitaji karama mbalimbali za Roho Mtakatifu. Karama zipo tofautitofauti na zinafanya kazi kwa kushirikiana kulijenga kanisa.

Vivyo hivyo na ninyi kwa kuwa mnatamani sana kuwa watu wenye karama za roho, takeni sana kwamba mzidi sana kuwa nazo ili kulijenga kanisa (1Wakoritho 14: 12).

Karama za Roho Mtakatifu hazifanyi kazi kwa ajili ya mtu binafsi bali kwa ajili ya kulijenga kanisa na si kwa mapenzi ya mtu binafsi bali kwa mapenzi ya Roho.

“Lakini kazi hizi zote huzitenda Roho huyo mmoja, yeye yule, akimgawia kila mtu peke yake kama apendavyo yeye''. (1 Wakoritho 12:11).

Karama za Roho Mtakatifu zimeorodheshwa katika barua ya kwanza ya mtume Paulo kwa Wakoritho kama inavyosomeka:

Lakini kila mmoja hupewa ufunuo wa Roho kwa kufaidiana. Maana mtu mmoja kwa Roho apewa neno la hekima na mwingine neno la maarifa, apendavyo Roho yeye yule; mwingine imani kwa Roho yeye yule; na mwingine karama za kuponya katika Ruho yule mmoja; na mwingine matendo ya miujiza, na mwingine unabii, na mwingine kupambanua Roho; mwingine aina za lugha, na mwingine tafsiri za lugha (1Kor 12:7-10).

Orodha nyingine zipo katika: 1Wakoritho 12:26-30; Waefeso 4:11.

7.  Hutuzalia matunda ya Roho katika maisha

Haiwezekani kuwa na tunda la Roho kama hatukuwa na Roho Mtakatifu kwani ndiye hutuletea hayo matunda. 

Lakini tunda la Roho ni upendo, furaha, amani, uvumilivu, utu wema, fadhili, uaminifu, upole, kiasi; juu ya mambo kama hayo hakuna sheria. Na hao walio wa Kristo Yesu wameusulibisha mwili pamoja na mawazo yake mabaya na tamaa zake. Tukiishi kwa Roho, na tuenende kwa Roho (Wagalatia 5:22-25).